Í klakfiskastöð Fiskeyjar á Dalvík er hrygningu klakfiskahópa stýrt með ljósi, sem leiðir til aðgangs að hrognum þrjú tímabil á ári. Hrognin eru flutt í seiðaeldisstöð Fiskeyjar á Hjalteyri við Eyjafjörð. Þegar seiðin eru 5-10 gramma þung, um sex mánuðum frá því að klak á sér stað, eru þau tilbúin til flutnings í matfiskeldisstöð félagsins í Þorlákshöfn eða eldisstöðvar erlendis.

Fiskey hefur verið stærsti einstaki framleiðandi lúðuseiða á heimsvísu frá árinu 1998. Árið 2002 framleiddi fyrirtækið 420 þúsund lúðuseiði og 750 þúsund seiði árið 2003.  Stefnt er að framleiða yfir 1 milljón seiða árið 2008.  Stærsti hluti af framleiðslunni er seldur til áframeldisstöðva erlendis.

Framleiðsla lúðuseiða hefur verið helsti þröskuldurinn í þróun lúðueldis í heiminum. Framleiðsla Fiskeyjar hefur farið vaxandi eins og sjá má á þessari töflu:

Framleiðsluferlið
Framleiðsla lúðuseiða krefst mikillar nákvæmni og stöðugleika í vinnubrögðum, tækjabúnaði og öllu skipulagi. Fiskey stýrir hrygningartíma klakfisks með sérstakri tækni, fóðurdýr sem notuð eru á fyrstu stigum eldisins eru ræktuð á staðnum, hitastigi sjávarins er stjórnað og notaður er fullkominn sjóhreinsibúnaður til þess að tryggja stöðugleika í umhverfi þessara viðkvæmu lífvera, allt frá hrognastigi til seiða. Skipta má framleiðsluferlinu í fimm stig:

Klakfiskur
Á Dalvík rekur fyrirtækið klakfiskastöð þar sem hrygningartíma klakfisksins hefur verið breytt og stýrt með birtu. Þannig næst jafnara framboð hrogna yfir allt árið og öryggi í framleiðslu og afhendingu seiða er mikið. Lúður eru kreistar til þess að fá úr þeim hrogn og svil en hrygningarhóparnir eru þrír yfir árið, það er á veturna, vorin og haustin. Hrogn og svil eru síðan flutt í eldisstöð Fiskeyjar á Hjalteyri við Eyjafjörð þar sem sjálf seiðaframleiðslan fer fram.

Hrognastig
Eftir að hrognin hafa verið frjóvguð með því að blanda þeim við svilin eru þau sett í ker í 5,5°C hita. Væg loftun er notuð til þess að dreifa hrognunum vel í kerjunum en hrognin eru höfð í myrkri til þess að þau þroskist eðlilega. Eftir 14 daga í kerjunum eru hrognin flutt í síló þar sem klakið fer fram.

Kviðpokalirfur
Í eldisstöðinni á Hjalteyri eru tólf 10 þúsund lítra síló sem hrognin eru sett í eftir 14 daga í hrognakerjum. Lirfa klekst úr hrogninu um sólarhring eftir flutninginn en hún er um 7 millimetra löng skömmu eftir klak, mjög vanþroska og viðkvæm. Kviðpokalirfan eru um 50 daga í sílóinu og í kviðpoka hennar er næringarforði sem endist henni þessa 50 daga. Eftir þann tíma hefur lirfan vaxið og þroskast og er tilbúin að fara að éta sjálf.

Fyrsta fóðrun
Tveggja mánaða gamlar eru lirfurnar fluttar í fóðrunarker. Meltingarkerfi þeirra er mjög einfalt og vanþroska. Þær geta ekki melt tilbúið fóður en verða þess í stað að fá lifandi fóðurdýr. Lirfurnar éta dýrasvif við náttúrulegar aðstæður en í eldi er notuð saltvatnsrækja (Artemia), sem fyrirtækið ræktar sjálft. Eftir 50 daga í fóðrunarkerinu myndbreytist lirfan og verður að seiði. Augun verða á sömu hlið og seiðin fá dökkan lit á aðra hliðina, færa sig niður á botninn og eru tilbúin að fara að éta og melta þurrfóður.

Seiði
Seiðin eru sett í seiðaker og eru þá um það bil 0,3 grömm að þyngd. Þurrfóðurgjöf hefst og eftir um það bil tvo mánuði er seiðið orðið um 5 grömm að þyngd. Þá er það tilbúið til flutnings í áframeldisstöð Fiskeyjar í Þorlákshöfn eða til viðskiptavina fyrirtækisins erlendis. Ferlið allt, frá hrogni til seiðis, tekur um sex mánuði.